Lipumba: Rais bora hawezi kutoka CCM

Siku kadhaa tangu Mwenyekiti wa Chama cha Mapinduzi (CCM), Rais Jakaya Kikwete kuwatahadharisha wajumbe wa Halmashauri Kuu (NEC), ya chama hicho kwamba wanapaswa kumteua mgombea wa urais anayekubalika ndani na nje ya chama hicho, Chama cha Wananchi (CUF), kimesema kauli hiyo haina ukweli.

Mwenyekiti wa CUF, Ibrahim Lipumba, akiwa na viongozi wenzake wa UKAWA, James Mbatia wa NCCR-Mageuzi na Freeman Mbowe wa CHADEMA.

Mwenyekiti wa CUF, Ibrahim Lipumba, akiwa na viongozi wenzake wa UKAWA, James Mbatia wa NCCR-Mageuzi na Freeman Mbowe wa CHADEMA.

Mwenyekiti wa CUF, Profesa Ibrahim Lipumba (pichani) amesema hakuna mtu anayefaa kuwa Rais ndani ya CCM, kwa kuwa mfumo wa chama hicho hauruhusu uadilifu.

Profesa Lipumba alisema hayo jana alipokuwa akihutubia wakazi wa Kijiji cha Kayombo wilayani Nzega.

Alisema  ndani ya CCM, kuna tatizo la kimfumo ambalo hata akitokea mtu mwadilifu akawa rais, bado atavurugwa na mfumo uliopo na kuwa fisadi.

“CCM kimekosa mfumo wa uadilifu hivyo hakiwezi kutuletea kiongozi wa nchi, kwani hata akitokea mtu mwadilifu akashinda, bado atavurugwa na mfumo huo wa kifisadi,” alisema Profesa Lipumba.

Sifa za Rais

Profesa Lipumba ambaye yuko mkoani Tabora kwa ziara ya kuhamasisha wananchi wajiandikishe kwenye Daftari la Kudumu la Wapigakura, alisema kwa hali ilivyo, Tanzania inahitaji Rais mwadilifu ambaye kimsingi, hawezi kutokea CCM.

Alisema uongozi wa CCM hauthamini dira ya Taifa na tatizo hilo ndilo linalofanya wananchi wawe na maisha magumu kwa kukosa uhakika wa matibabu, elimu bora na chakula.

Profesa Lipumba alisema wananchi hawapati matibabu ya uhakika kwa kuwa zahanati na hospitali hazina dawa. Lakini hayo yakiendelea, viongozi wanakwenda kutibiwa nje ya nchi.

“Elimu nayo inatolewa kwa ubaguzi. Watoto wa maskini wanasoma sekondari za kata ambazo hazina walimu wala vitabu na watoto wa matajiri wanasoma shule zenye walimu na vitabu,” alisema.

Profesa Lipumba alibainisha kwamba endapo CUF itaingia madarakani, wananchi watapata haki mbalimbali zikiwamo za elimu, afya na haki nyingine tofauti na ilivyo sasa.

Aliwataka wananchi kutambua kuwa uchaguzi ndiyo fursa ya kuitoa CCM madarakani na kwamba hawawezi kupiga kura kama hawajajiandikisha kwenye Daftari la Kudumu la Wapigakura.

Aliwataka wakazi wote wa Bukene wenye sifa kufika kwenye vituo na kujiandikisha ili baadaye washiriki kwenye Uchaguzi Mkuu uliopangwa kufanyika Oktoba 25.

Chanzo: Gazeti la Mwananchi la tarehe 27 Mei 2015

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s