CUF yamtaka Kikwete kuunusuru uchaguzi

Chama cha Wananchi (CUF), kimemtaka Rais Jakaya Kikwete kutotoka nje ya nchi katika kipindi hiki cha kuelekea kwenye Uchaguzi Mkuu ili ashughukie maandalizi yake ipasavyo.

Mwenyekiti wa CUF, Prof. Ibrahim Lipumba

Mwenyekiti wa CUF, Prof. Ibrahim Lipumba

Kauli hiyo ilitolewa na mwenyekiti wa chama hicho, Profesa Ibrahim Lipumba alipokuwa akizungumza na wakazi wa Wilaya ya Nzega katika ziara yake ya siku 10 mkoani Tabora.

“Hadi sasa hakuna matumaini kwamba Uchaguzi Mkuu utafanyika kama ilivyopangwa, hivyo Rais lazima awepo nchini aangalie wapi tumekwama na aingilie kati kunusuru mchakato huo,” alisema Profesa Lipumba.

Alisema Rais Kikwete anapaswa kuwa makini, vinginevyo uchaguzi utavurugwa.

“Tunatoa ushauri kwa Rais Kikwete kusitisha safari zake za nje ya nchi ili aweze kuhakikisha maandalizi ya Uchaguzi Mkuu yanakamilika kwa wakati, vinginevyo mambo yatavurugika,” alisema Profesa Lipumba.

Mwenyekiti huyo wa CUF, pia alitoa wito kwa watu wote wenye sifa kujiandikisha kwenye Daftari la Kudumu la Wapigakura na asiwepo mtu wa kuachwa kuandikishwa kwa kisingizio chochote.

Hata hivyo, aliilaumu Serikali kwa kile alichokieleza kuwa imeipangia Tume ya Taifa ya Uchaguzi (NEC), fedha kidogo kwa ajili ya uchaguzi, jambo ambalo linaashiria kuwa hakuna maandalizi ya maana ya Uchaguzi Mkuu.

Safari za Rais nje

Profesa Lipumba alisema safari za Rais  Kikwete nje ya nchi  zinagharimu kati ya Sh5 bilioni na Sh10 bilioni. Alisema hayo ni matumizi mabaya hasa kwa Serikali ambayo pia haiwajibiki kukusanya kodi ipasavyo.

Profesa Lipumba pia aliishangaa Serikali kwa kutoa misamaha ya kodi kwa kampuni mbalimbali, bila kuwa na vyanzo mbadala vya mapato kwa ajli ya kuendeshea shughuli zake, akisema hatua hiyo ni hatari kwa ustawi wa nchi.

Profesa Lipumba alisema kuwa kiinua mgongo cha Sh230 milioni kwa kila mbunge ni sehemu ya matumizi ya fedha za Serikali na ndiyo kinachosababisha mivutano mikali wakati wa kura za maoni ndani ya CCM.

“Mkitaka maisha mazuri iondoeni Serikali ya CCM isiyowajali wananchi wake na yenye matumizi mabaya ya fedha zenu wananchi,” alisema.

Profesa Lipumba yupo katika ziara mkoani Tabora kuhamasisha wananchi kujitokeza kujiandikisha katika Daftari la Kudumu la Wapigakura na atatembelea wilaya zote saba za Mkoa wa Tabora.

Chanzo: Gazeti la Mwananchi la tarehe 26 Mei 2015

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s